الله لا يغير علينا

تمخض البعير ويابلنا فأر صغيرون .
ماشاء الله عليهم إخوانا أعضاء مجلس الأمه كل هالصراخ والعويل وإطلعولنا بقانون المرأة ما تداوم غير للساعة 8 بالليل يعني إلي عنده زوجته بتولد بالليل يصبرها ليما الصبح لغاية ما تداوم الدكتورة ولاو ينطرها ليما تتريق وتشرب الشاي .
سؤالي للأعضاء المحترمين أصحاب القرار الجهبذي إذا تبون تسافرون بالليل مع أهلكم من تبون يفتشهم بالمطار الشرطي وإلا عمال التنظيف .. إذا طبقوا القانون أنا أول واحد أقدم إستقالتي وأشتغل مفتش بالمطار وأداوم بس بالليل.
ودمتم يانواب البقعه

وين الهيبه

أول لما يبون يخرعون اليهال يقولون لهم ترى بنييبلكم الشرطي أو نادوا الظابط ترى فلان يصرخ أو يلعب بالسكه والحين إذا تبي تخرع الظابط أو الشرطي نادلة أي ياهل أو شاب وإهو إلي يخرع العسكري.
وين هيبه زمان وين الإحترام ما أدري السبب من العسكريين أو من الناس إلي صايرين جباريت ماينتحاجون , أسمع من الناس وأشوف في الجرايد بلاوي مع العسكريين إلي صار حتى الأجانب يمسحون بالعسكري القاع مثل ما قرينا في الجرايد قبل جم يوم إن مصريه تهاوشت مع الشرطه وخلت صاحبها ينحاش ومصريه ثانيه إنزلت من سيارتها وصكت الشرطي كف , والله ياجماعه لو هالشي صار حق عسكري مصري من أي أجنبي جان حنطوه يم فرعون علشان يصير عبرة للناس بس أأأأأأأأأأأأأخ ديرتنا ديرة واصطات للصاقطات والراقصات.
ودمتم